2 აპრილს ტელეკომპანია „ფორმულას“ 12.00 საათის საინფორმაციო გამოშვების წამყვანმა მაყურებელს ინფორმაცია მიაწოდა მთავრობაში განხორციელებული საკადრო ცვლილებების შესახებ და აღნიშნა:

"ოლიგარქის მთავრობაში ცვლილებებია. რეჟიმის მსახურება ანრი ოხანაშვილს დაუფასდა. რუსული კანონის მხარდამჭერი ოხანაშვილი სუს-ის ხელმძღვანელად ინიშნება. გრიგოლ ლილუაშვილი კი რეგიონული სამინისტროს ხელმძღვანელად ინიშნება. ეს ცალკე სამინისტრო იქნება, რომელიც ინფრასტრუქტურას გამოეყოფა - ამ უწყებას კვლავ ირაკლი ქარსელაძე უხელმძღვანელებს. რაც შეეხება იუსტიციის სამინისტროს - ამ პოსტზე ოლიგარქი პაატა სალიას ნიშნავს. ის პარლამენტში ღალატის კომისიის წევრი და პროპაგანდისტული "რუსთავი 2-ის" ყოფილი გენერალური დირექტორია."

წამყვანის ტექსტიდან ფაქტი არის ის, რომ მთავრობაში საკადრო ცვლილებები განხორციელდა. ცვლილებების თანახმად: ანრი ოხანაშვილი სუს-ის უფროსად, გრიგოლ ლილუაშვილი კი ცალკე გამოყოფილი რეგიონული სამინისტროს ხელმძღვანელად დაინიშნა; ინფრასტრუქტურის მინისტრი კვლავ ირაკლი ქარსელაძე იქნება, ხოლო, იუსტიციის სამინისტროს პაატა სალია უხელმძღვანელებს.

წამყვანის ფრაზები - "რუსული კანონის მხარდამჭერი", "პარლამენტში ღალატის კომისიის წევრი და პროპაგანდისტული "რუსთავი 2-ის" ყოფილი გენერალური დირექტორი" - არის შეფასებები, რომელიც მან ფაქტისგან არ გამიჯნა.

ფაქტის და შეფასების გამიჯვნა ჟურნალისტიკის ერთ-ერთი უმნიშვნელოვანესი სტანდარტია. გამიჯვნის პრინციპი გულისხმობს ინფორმაციის ისეთი სახით მიწოდებას, რომ აუდიტორიამ დაინახოს განსხვავება ფაქტებსა და მოსაზრებებს შორის.