კომპოზიტი „ადგილმდებარეობა“ ყოველთვის უსულო ობიექტის მიმართ გამოიყენება, განსხვავებით „ადგილსამყოფლისგან“, რომელიც, ჩვეულებრივ, სულიერ არსებაზე ითქმის, მაგრამ შესაძლოა ინსტიტუციების მიმართაც ვიხმაროთ (მაგალითად: „სკოლამ შარშან შეიცვალა ადგილმდებარეობა / ადგილსამყოფელი“).

როგორც ყოვლად მიუღებელია ითქვას: „ჩემი მეგობარი ამჟამად საზღვარგარეთ მდებარეობს“, ასევე უმართებულოა ეს ფრაზაც: „ჩემი მეგობრის ამჟამინდელი ადგილმდებარეობა ჩემთვის უცნობია“.

არადა, მედიაში უმეტესად სიტყვა „ადგილმდებარეობას“ სწორედ ამგვარ კონტექსტებში ვხვდებით!

მაგალითები ვნახოთ:

„მეზღვაურების ადგილმდებარეობა ამ მომენტისთვის გარკვეული არ არის“;

„ოჯახის დანარჩენი 9 წევრის ადგილმდებარეობა უცნობია“;

„დამნაშავეების ადგილმდებარეობა უცნობია“;

„კიევის მონაცემებით, დონბასში, იმ ადგილებში, რომლებსაც უკრაინის მთავრობა ვერ აკონტროლებს, კვლავ ტყვეობაში რჩება 100-მდე პირი და მათგან ბევრის ადგილმდებარეობა უცნობია“;

„ცოტა ხნის წინ [თურქეთის] პრეზიდენტი სწორედ რეზიდენციაში იმყოფებოდა, ამ დროისთვის მისი ადგილმდებარეობა უცნობია“;

ხაზგასმული სიტყვის ადგილას ყველგან „ადგილსამყოფელი“ უნდა იყოს.