ჩვენს საზოგადოებრივ თუ მედია-ლექსიკონში ხშირად გამოიყენება ზმნათა ისეთი ფორმები, როგორებიცაა - გააჟღერა, დააფიქსირა და გაახმოვანა. მათ, ძირითადად, უმართებულოდ ხმარობენ.

მაგალითად: მწერალმა საინტერესო აზრი გააჟღერა;

მოსწავლემ დააფიქსირა, რომ შესვენებაზე ეზოში იმყოფებოდა;

მოსამართლემ გადაწყვეტილება დაგვიანებით გაახმოვანა და ა.შ.

გააჟღერა ფორმის გამოყენება მართებულია კონკრეტულ კონტექსტში (თუკი წინადადების შინაარსი მუსიკას უკავშირდება).

მაგალითად, მუსიკოსმა გიტარის სიმები გააჟღერა.

დანარჩენ შემთხვევაში, გააჟღერა სხვა ზმნებით უნდა ჩავანაცვლოთ - აღნიშნა, განაცხადა, გამოთქვა...

მაგალითად: მწერალმა საინტერესო აზრი გამოთქვა.

უმართებულოა აფიქსირებს ზმნის გამოყენება აღნიშნა/თქვა/განაცხადა მნიშვნელობით.

ის ბუნებრივია შემდეგ კონტექსტში: მეცნიერმა არაერთი ანალოგიური ფაქტი დააფიქსირა;

მაგრამ, შეცდომაა: მეცნიერმა დააფიქსირა, რომ მისი ნაშრომი კონკრეტულ კვლევას ეფუძნება.

ასევე, უმართებულოა ახმოვანებს ზმნის გამოყენება აზრის გამოთქმის ან გამოცხადების მნიშვნელობით, მაგალითად: მოსამართლე თავის გადაწყვეტილებას დღეს გაახმოვანებს;

სწორია: მოსამართლე თავის გადაწყვეტილებას დღეს გამოაცხადებს/განაცხადებს...

ახმოვანებს ზმნის გამოყენება მართებულია სხვა კონტექსტშიც: ფილმის პერსონაჟს ქართველი მსახიობი ახმოვანებს.